Steve Easterbrook, forstjóri og stjórnarformaður skyndibitakeðjunnar McDonalds, lét af störfum um helgina. Upp komst um ástarsamband hans og starfsmanns hjá fyrirtækinu en ástarsambönd hæst settu yfirmanna keðjunnar við undirmenn sína eru á bága við stefnu og reglu McDonalds. Stjórn keðjunnar tók því þessa ákvörðun á föstudag, að vandlega íhuguðu máli.
Fyrirtækið sendi frá sér yfirlýsingu þar sem segir að forstjórinn, Steve Easterbrook, hafi sýnt slæma dómgreind þegar hann ákvað að hefa ástarsamband við undirmann sinn. Ekki kemur fram hvort Easterbrook hafi verið rekinn eða beðinn um að segja upp störfum.
Yfirmaður McDonalds í Bandaríkjunum, Chris Kempczinski, mun taka við forstjórastöðunni af Easterbrook og einnig sæti hans í stjórninni. Þetta kom fram á vef Rúv.