Fatastíll sönkonunnar Bjarkar er til umfjöllunar í tískutímaritinu Vogue. Í umfjölluninni er stíl hennar lýst sem frjálslegum og fjölbreyttum en einnig er henni hrósað fyrir að styðja vel við nýja og minni hönnuði sem fara ótroðnar slóðir. Með umfjöllun Vogue fylgir myndaalbúm sem gefur lesendum innsýn inn í hvernig stíll Bjarkar hefur þróast í gegnum árin.
„Í hátt í þrjátíu ár hefur Björk ekki aðeins nálgast og kunnað að meta fatnað sem breytilegt listform, heldur hefur hún í leiðinni orðið einskonar einnar-konu tískusjóður sem gefur framúrstefnulegum hönnuðum tækifæri og sýnileika.“
Einnig er tekið fram í greininni að Björk sé dugleg að klæðast hönnun frá stórum og þekktum tískuhúsum.
Umfjöllunina í heild sinni og myndasafnið má sjá á vef Vogue.
Mannlíf greindi frá þessu.