Vala Matt hitti Sollu Eiríks á dögunum og var hún í spjalli í Íslandi í dag á Stöð 2 á miðvikudagskvöldið.
Solla er sennilega hvað þekktust fyrir að vera einskonar frumkvöðull hollustufæðis hér á landi og opnaði meðal annars veitingastaðinn Gló. Hún tekur nú þátt í Allir geta dansað sem sýndur er á Stöð 2 í vetur og segir dansinn hafa rifið sig úr kulnun.
„Þegar þú ert búin að keyra þig alveg út að ystu nöf þá fer maður í svona „burn out“. Fyrstu dagana þegar ég gat sofið lengur þá vaknaði ég oft eins og ég væri með stóra steypuhellu ofan á mér. Fyrstu dagana þurfti í raun að taka mig upp með kíttispaða.“
„Svo byrja æfingar og ég man á fyrstu æfingunni held ég að ég hafi getað dansað í svona korter. Ég var bara búin, taugakerfið, líkaminn og allt saman. En dansinn er bara guðgómlegur.“
Solla sýndi Völu meðal annars hvernig hægt er að gera hollt jólasælgæti. Innslagið má sjá í heild sinni hér fyrir neðan.