Rétt fyrir klukkan eitt í nótt fékk lögreglan á höfuðborgarsvæðinu tilkynningu um líkamsárás og eignaspjöll í Hlíðahverfi. Þrír eða fjórir ungir strákar höfðu bankað hjá íbúa í kjallara og þegar íbúinn kom til dyra réðust þeir á hann. Við það brotnaði rúða og strákarnir hlupu í burtu. Þetta kemur fram í tilkynningu frá lögreglu.
Ekki kemur fram hvort piltarnir hafi fundist eða hvort húsráðandi hafi hlotið einhverja áverka.