Á síðasta ári birti Nútíminn fjöldann allan af gómsætum uppskriftum í samstarfi við Gestgjafann en nokkrar þeirra slógu alveg sérstaklega í gegn hjá lesendum okkar. Við höfum nú safnað þessum vinsælu uppskriftum saman og munum næstu daga birta vinsælustu uppskriftirnar árið 2023.
Við byrjum á þessari safaríku uppskrift sem við fengum hjá matreiðslumönnum Gestgjafans en um er að ræða kjúklingabringur sem næstum því brutu internetið.
Hér bjóðum við upp á vinsæla uppskrift að hætti Gestgjafans sem á eftir að slá í gegn á öllum heimilum!
Þessi uppskrift er frekar skotheld hvað það varðar að bringurnar verða smá stökkar að utan en mjúkar og safaríkar að innan. Hér er galdurinn að elda þær hratt á háum hita. Stillið ofninn á 210 gráður og bringurnar ættu að vera klárar eftir 18 mínútur. Þegar bringurnar eru farnar að fá gyllta karamellu áferð eru þær orðnar fullkomlega eldaðar.
Hráefni:
- 4 meðalstórar kjúklingabringur
- 1 tsk paprika
- 1 tsk oregano, timjan, eða annað krydd að eigin vali
- 1/4 tsk hvítlauksduft
- 1/2 tsk salt
- 1/2 tsk pipar
- 1 1/2 msk púðursykur
- 2 msk olívuolía
Aðferð:
1. Stillið ofninn á 210 gráður. Berjið létt á kjúklingabringurnar með kjöthamri eða með hnefanum. Þetta gerir þær ennþá mýkri.
2. Blandið kryddunum og púðursykrinum saman í skál. Leggið bökunarpappír á ofnplötu og raðið kjúklingabringunum á plötuna. Penslið eða nuddið olíunni á kjúklinginn og kryddið. Snúið honum við og gerið það sama á hinni hliðinni.
3. Bakið kjúklinginn í 18 mínútur eða þar til hann verður gylltur( ef þú ert með kjötmæli þá á innri hitinn að vera 75 gráður ) Púðursykurinn gerir kjúklinginn gylltan og smá karamellu-kenndan en ekki of sætann. Berið kjúklinginn fram með ykkar uppáhalds meðlæti