Íslenskur maður kom fram nafnlaust á Bylgjunni í morgun og greindi frá því að hann og eiginkona hans gætu ekki gengið frá sölu á fasteign sinni vegna þess að útlent fólk, sem þau þekkja ekki til, hafi skráð lögheimili sitt á húsið.
„Við hjónin erum búin að eiga hús í þrjú ár sem við höfum verið að leigja út. Svo gerðist það nú að leigjendurnir sögðu upp leigunni og fluttu út. Þá vorum við að velta fyrir okkur hvort við ættum að leigja áfram eða selja og við ákváðum að selja húsið,“ segir maðurinn en hann segist hafa kannað af rælni á heimasíðu Þjóðskrár lögheimili á húsinu og séð þá að þar voru þrír einstaklingar skráðir með lögheimili, leigjandinn fyrrverandi, og tvö önnur sem hann kannast ekki við. DV greinir frá og vitnar í Bylgjuna.
Blaðamaður flutti lögheimilið á Bessastaði
Um er að ræða hvimleiðan vanda sem blaðamaður Nútímans taldi að væri búið að fyrirbyggja hjá Þjóðskrá – þá sérstaklega í ljósi þess að fyrir sjö árum, þegar blaðamaðurinn sem skrifar þessa grein, skráði lögheimili sitt á Bessastöðum, nánar tiltekið í Norðurhúsi á heimili forseta Íslands. Það var fyrir sjö árum – svo virðist sem að ekkert hafi breyst í vinnslu slíkra skráninga hjá Þjóðskrá Íslands.
Leigjandinn hafði þá skráð, líkt og fjölmargir aðrir sem nýta sér velferðarkerfi landsins og svindla út bæði félags- og atvinnuleysisbætur, án samþykkis eigandans, tvær manneskjur með lögheimili í húsinu. Eftir að maðurinn hafði samband við leigjandann afskráði hann nafn sitt af húsinu en sagðist ekki geta afskráð hitt fólkið.
Fjögur þúsund slík mál í vinnslu
Húseigandinn sagðist í samtali við Bylgjuna hafa haft samband við Þjóðskrá í kjölfarið og fyllt út staðlað form til að ógilda lögheimili fólksins en afgreiðslutíminn væri afar langur. Eftir að maðurinn hafði beðið í tvo mánuði eftir úrlausn hjá Þjóðskrá var honum tjáð að hann gæti þurft að bíða í hálft ár í viðbót. Ástæðan væri sú að Þjóðskrá væri með hátt í fjögur þúsund mál af þessu tagi í vinnslu, þar sem fólk situr uppi með að einhver hefur skráð lögheimili á eignina og ekki hægt að fjarlægja viðkomandi af henni.
Blaðamaður Stundarinnar flutti lögheimili sitt á Bessastaði í nokkra daga
Maðurinn segir að honum sé haldið í herkví. Hjónin hafi verið búin að selja húsið en fasteignasalinn sagt að ekki væri hægt að skrifa undir kaupsamning fyrr en búið væri að afskrá lögheimili fólksins af henni.
Ókunnuga fólkið hefur andmælarétt sem tefur vinnslu málins. Maðurinn segir að annaðhvort sé Þjóðskrá undirmönnuð eða lög og reglur um þessi mál séu ekki nógu skýr.