Michael Peter Balzary, betur þekktur sem Flea úr hinni goðsagnakenndu sveit Red Hot Chili Peppers, er staddur á landinu en það var argentínskur ferðamaður sem kom auga á hann í nágrenni Reykjavíkur þar sem hann spókaði sig um í íslenskri náttúru. Flea er bassaleikari í hljómsveitinni og er þekktur fyrir sinn einstaka stíl á bassanum sem hann plokkar eins og enginn sé morgundagurinn.
Flea, sem er 61 árs gamall, er einn af lykilmönnum í Red Hot Chili Peppers og kom að stofnun sveitarinnar í Los Angeles árið 1983. Þessi goðsagnakenndi bassaleikari er mikið umhugað um dýravelferð og umhverfisvernd en ekki er vitað hvort það tengist heimsókn hans til landsins. Hann hefur marga fjöruna sopið og talar opinskátt um líf sitt í viðtölum en hann var á tímabili djúpt sokkinn í fíkniefnaneyslu líkt og margir aðrir rokkarar vestanhafs og víðar.
Í dag er Flea virkur talsmaður heilbrigðs lífsstíls og hefur einnig talað gegn fíkniefnaneyslu og þeim skaða sem hún getur valdið. Hann hefur lagt áherslu á mikilvægi þess að halda jafnvægi í lífinu og að finna leiðir til að höndla streitu og álag á heilbrigðan hátt.
Það er því ljóst að mikill stjörnufans er á Íslandi um þessar mundir en fjölmiðlar hafa greint frá því að Hollywood-leikarinn Brad Pitt sé einnig staddur hér á landi. Er hann sagður þeysast um á mótorfák um sveitir landsins.