Allt landið blikkar af annaðhvort gulum eða appelsínugulum veðurviðvörunum sem taka gildi hver af annarri í dag. Um er að ræða knappa og dýpkandi lægð sem er skammt suðvestur af Reykjanesi nú í morgunsárið en mun svo ferðast norður.
Það verður varasamt að vera á ferðinni í dag og er fólk hvatt til að tryggja lausamuni, sýna aðgát og vera ekkert á ferðinni norðanlands síðdegis í dag.
Sunnan 15-23 m/s, en úrkomulítið norðaustanlands. Hiti 7 til 17 stig, hlýjast norðaustanlands. Snýst í suðvestan 20-28 með skúrum eða slydduéljum norðantil eftir hádegi, jafnvel 30 m/s um tíma norðvestantil, en 13-20 og skúrir syðra. Dregur talsvert úr vindi í kvöld og kólnar í veðri, en lægir í nótt. Suðaustan 8-15 og skúrir á morgun, hvassast syðst, en bjartviðri á Norður- og Austurlandi. Hiti 1 til 10 stig, hlýjast syðra.