Þetta er svar við pistli Snorra Mássonar sem birtist á Vísi í dag.
Snorri vísar réttilega til efnahagslegra útreikninga, óvissu og lamandi ákvarðanafælni („analysis paralysis“), en lætur hjá líða að nefna einn afgerandi þátt í lækkandi fæðingartíðni á Vesturlöndum, Ísland þar með talið: sjálfsdekrið.
Hvað er sjálfsdekrið?
Undir þessum skynsemisrökum kraumar minna ræddur sannleikur – eitraður kokteill sjálfhverfu og einstaklingshyggju, fullkomlega eimaður af auðugum vestrænum samfélögum.
Foreldrahlutverkið skerðir persónulegt frelsi, þægindi, tómstundir og lífsstílsval.
Ungir Íslendingar samtímans velja fremur að sötra Margarítur á Tenerife en sinna bleiuskiptum heima.
Vestrænn tíðarandi dýrkar persónulega sjálfsuppfyllingu, sjálfræði, sjálfsrækt og takmarkalausa nautn – gildi sem rekast harkalega á þær skyldur, byrðar og seinkuðu umbun sem felast í því að ala upp börn.
„það eru innflytjendur og svo eru það múslímskir innflytjendur.“
Bætist þar við að áhrif trúarbragða á daglegt líf hafa gufað upp, og blasir þá við uppskrift að lýðfræðilegri sjálfseyðingu.
Vissulega eru fjárhagslegar hindranir, húsnæðisskortur og kostnaður við barnagæslu raunverulegir þröskuldar, en menningarlega umskiptin í átt að sjálfsupphafningu og sældarhyggju vega engu síður þungt.
Það að Snorri skuli ekki taka þessi djúpstæðu umskipti til greina gerir greiningu hans óhjákvæmilega ófullkomna.
Innflytjendur
Annar og ekki síður alvarlegur veikleiki er sá fölskvalausi samanburður sem Snorri gerir á innflytjendum. Innflytjendamál eru engan veginn einsleitt fyrirbæri.
Við verðum að varpa frá okkur þægilegum blekkingum og horfast í augu við staðreyndirnar: það eru innflytjendur og svo eru það múslímskir innflytjendur.
Þetta tvennt er ekki af sama toga. Þegar íslam festir hér rætur mun Ísland vakna við allt annan veruleika.
Nú þegar má sjá fyrstu sprotana („green shoots“) að verðandi bannsvæðum („no-go zones“) í Breiðholtinu.
Ég hef skrifað ítarlega um þetta efni. Snorra væri hollt að kynna sér þau skrif mín sem liggja fyrir í ítarlegu skjalasafni.
Hvað sem öðru líður er afstaða mín skýr og óhagganleg: Ísland verður að setja þegar í stað algjört moratorium á ALLA innflytjendamóttöku.
Öllum undanþágum skal úthluta af mikilli varfærni, metið af nákvæmni í hverju tilviki fyrir sig, og þá eingöngu á grundvelli íslenskra þjóðarhagsmuna.
Rajan Parrikar fæddist í Goufylki Indlands, hlaut skaðmenntun í Bandaríkjunum og var endurbættur á Íslandi. Vefsetur hans er https://parrikar.com