„Það sem ég get sagt er að það verða breytingar. Ég mun taka mér smá tíma í að teikna þær breytingar upp en ljóst er að spennandi tímar eru framundan á stöðinni,“ segir Ríkharð Óskar Guðnason, Rikki G, nýr dagskrárstjóri FM957.
Eins og Nútíminn greindi frá í gær var dagskrárstjóranum Heiðari Austmann sagt upp á dögunum. „Nú er þessum kafla lokið og eitthvað nýtt og spennandi tekur við,“ sagði Heiðar sem hafði starfað á FM957 sem útvarpsmaður og síðar dagskrárstjóri í 17 ár.
Rikki G hefur starfð á FM957 í 10 ár. „Heiðar var einn af þeim sem tók mér með opnum örmum og gaf mér punkta sem nýttust mér heldur betur vel,“ segir hann. „Það voru forréttindi að starfa með honum og við erum mjög góðir félagar.“
Spurður hvort starf dagskrárstjóra á FM957 sé draumastarfið segir Rikki að draumur hvers manns að vinna við það sem honum finnst skemmtilegt:
Þetta var óvænt tækifæri sem datt upp í hendurnar á mér og var aldrei í stöðunni að hafna slíku tækifæri. Það er mikið af hæfileikaríku fólki að vinna á stöðinni og vonandi bætast fleiri við í hópinn.
Það verður að teljast svolítið sérstakt að nýr dagskrárstjóri FM957 er með merki X977 húðflúrað á sig en þessar stöðvar hafa löngum eldað grátt silfur saman. Rikki tapaði veðmáli fyrir nokkrum árum og er því merktur Xinu. Hann segir útvarpsmanninn Mána í Harmageddon í skýjunum með ráðningu sína. „Hann talar ekki um annað en að dagskrárstjóri FM957 sé með X977 tattú. Reyndar er tengingin hjá þessum stöðvum orðin svo góð að ég ber þetta merki stoltur í dag. En myndi ég láta hafa mig út í svona vitleysu aftur? Aldrei!“
