Umdeilt frumvarp Sigmundar Davíðs Gunnlaugssonar forsætisráðherra er þingskjal númer 666. Í frumvarpinu er meðal annars gert ráð fyrir því að ráðherra ákveði aðsetur stofnunar sem undir hann heyrir, nema á annan veg sé mælt í lögum.
Róbert Marshall, þingmaður Bjartrar framtíðar bendir á þetta á Facebook-síðu sinni í dag:
Örlítill punktur um samhengi hlutanna: Nýjasta framlag skemmtinefndar Skagfirsku ríkisstjórnarinnar um flutning stofnanna undir húsvegg kaupfélagsins á Sauðárkróki ætti að skoða í samhengi við frumvarp forsætisráðherra um stjórnarráð Íslands sem hlotið hefur hið drungalega málsnúmer 666 í bókhaldi Alþingis. Sigurður Ingi og Bjarni Ben ákváðu (meðan Sigmundur Davíð var í útlöndum) að best væri að geyma málið þangað til í janúar.
Róbert bætir við að frumvarpið gæti gert stjórnsýslunna talsvert einfaldari:
„Ef hægt er að einfalda stjórnsýsluna nóg þá getur maður stýrt landinu með sms-um. Eða í gegnum Skype. Maður þarf þá ekki einu sinni að vera á Íslandi!“