Bandaríski fáninn sem hangir utan á American Bar fer í taugarnar á þingmönnum og starfsmönnum Alþingis.
Starfsmönnum Alþingis og þingmönnum hugnast það ekki, þegar þeir ganga til vinnu í Austurstræti og funda, að þurfa að ganga inn undir bandaríska fánanum sem hangir utan á American Bar í Austurstræti. Þetta kemur fram í Morgunblaðinu í dag.
Uppfært kl. 11.56: American Bar hefur tekið niður fánana
Morgunblaðið greinir frá því að Alþingi leigir stóran hluta Austurstrætis 8-10 undir skrifstofur. Þar er skrifstofa nefndasviðs Alþingis ásamt skrifstofum þingflokks Sjálfstæðisflokksins, þingflokks Bjartrar framtíðar og starfsfólks Alþingis.
American Bar er á jarðhæð en barinn flaggar bandaríska fánanum bæði Austurstrætismegin og Austurvallarmegin.
Vilhjálmur Bjarnason, alþingismaður, segir í samtali við Morgunblaðið að það sé óþolandi, þegar hann gengur inn í skrifstofuhúsnæði Alþingis, að ganga undir bandaríska fánann. Einar K. Guðfinnsson, forseti Alþingis, er sammála.
Mér finnst þetta algjörlega óþolandi. Ég veit ekki annað en búið sé að ræða við eigendur hússins. Ég að minnsta kosti bað um að það yrði gert.
Einar segir í Morgunblaðinu að þetta undirstiki þörfina á því að Alþingi væri í sínum eigin húsakynnum, þar sem þingið gæti ráðið öllu sem því við kemur.