Ýmislegt hefur gengið á fyrir næstu þáttaröð af Ísland Got Talent. Auðunn Blöndal hefur stigið til hliðar sem kynnir þáttarins og rapparinn Emmsjé Gauti kemur í hans stað.
Gauti stúderar nú hvernig Auddi fór að þessu og var að því í gærkvöldi ásamt Kela, trommara Agent Fresco
Ég og @emmsjegauti erum að borða pizzu og stúdera @Auddib.
— Hrafnkell Guðjónsson (@Keli1989) October 5, 2015
Auddi var ánægður með þessa byrjun hjá Gauta og svaraði að bragði
@Keli1989 @emmsjegauti "snoðaður" með Dominos er sterk byrjun!!
— Auðunn Blöndal (@Auddib) October 5, 2015
Gauti sagði í viðtali í Fréttablaðinu í morgun að hann ætli ekki að toppa Audda.
Hann er frábær í sínu starfi og með mikla reynslu í sjónvarpi. Ég ætla bara að gera mitt vel. Það er bara heiður að vera á eftir manni eins og Audda, sem ég hef fylgst með síðan hann var í 70 mínútum að borða snakk og með strípur.
Einnig er búið að skipta út öllum dómurum þáttarins. Söng- og leikkonan Ágústa Eva Erlendsdóttir verður í dómnefndinni í vetur. Ágústa er fjórði og síðasti dómarinn sem kynntur er til leiks, en með henni í dómnefnd verða Jakob Frímann Magnússon, Dr. Gunni og Marta María Jónasdóttir.
Heimildir Nútímans herma að Jón Gnarr, nýráðinn ritstjóri 365, sé maðurinn á bakvið breytingarnar á dómarateyminu og að hann hafi viljað hrista upp í þættinum. Honum hefur heldur betur tekist það og spennandi verður að sjá útkomuna.
En hvað er næsta skref hjá Gauta? Fara í ræktina.
„Ég er í þann mund að henda mér í ræktina. Ég samdi við Jón Gnarr um áskrift að Stöð 2 og korti í ræktina. Ég ætla klárlega að vera hot stöff á þessum pósterum og á skjánum,“ sagði hann í Fréttablaðinu.