Ný stikla úr gamanmyndinni Zoolander 2 hefur verið birt á Youtube. Horfðu á stikluna hér fyrir ofan. Myndin verður frumsýnd í febrúar á næsta ári og eins og Nútíminn greindi frá á dögunum fer Ólafur Darri með lítið hlutverk.
Sjá einnig: Ólafur Darri í Zoolander 2: „Hefði verið til í að snúa rassinum í vélina og borga með mér!“
Ben Stiller framleiðir, leikstýrir og fer með aðalhlutverk í myndinni sem beðið er eftir með mikilli eftirvæntingu en fyrri myndin sló eftirminnilega í gegn.
Ólafur Darri sagði í samtali við Nútímann að hann hafi tekið þátt í tökum á myndinni í Róm í sumar.
„Það er búið að taka hana upp og hún verður frumsýnd í febrúar á næsta ári. Þetta var ógeðslega skemmtilegt,“ segir hann en hann hafði aldrei komið til Ítalíu áður en kallið frá Ben Stiller kom.
Ólafur var mjög hrifinn af fyrri myndinni sem hann segir að sé ein fyndnasta mynd allra tíma. Hann bíður sjálfur spenntur eftir framhaldinu en á meðal annarra leikara í myndinni eru Penelope Cruz, Owen Wilson, Kristen Wiig og Will Ferrell. Þá koma Justin Bieber og Kanye West fram í myndinni.