Hlynur Sigurðsson, einn af eigendum Nútímans, var gómaður í símanum að keyra bíl Nútímans í gær, daginn sem þjóðarátak gegn slíkri hegðun hófst á Nútímanum. Sjáðu myndbandið hér fyrir ofan.
Sjá einnig: Skelfilega margir í símanum undir stýri, sjáðu nýtt myndband úr umferðinni í Reykjavík
Nútíminn birti í gær nýtt myndband sem sýndi fólk í símanum í umferðinni í Reykjavík. Myndbandið vakti gríðarlega athygli en ásamt því að birta myndbandið skoraði Nútíminn á fólk ásamt Samgöngustofu, VÍS, Sjóvá og TM að láta af símanotkun undir stýri. Myllumerkið #égætlaaðhætta var notað til að halda utan um áskoranir fólks á samfélagsmiðlum.
Það var svo árvökull lesandi Nútímans sem gómaði Hlyn og það ótrúlega er lesandinn hafði sjálfur verið böstaður í myndbandi Nútímans.
Þetta var því eins vandræðalegt og það gerist fyrir Nútímann og Hlynur áttar sig á því. „Þetta sýnir að þörfin á átakinu er gríðarleg. Meira að segja við sem förum af stað með átakið gleymum okkur,“ sagði hann þegar þjarmað var að honum á ritstjórnarskrifstofu Nútímans.
Hlynur hefur beðist afsökunar á hegðun sinni. „Ég er samt ekki í Panama-skjölunum,“ segir hann.
Horfðu á myndbandið og taktu þátt í átakinu!