Arnar Páll Hauksson, fréttamaður á RÚV, virtist ekki átta sig á því að bein útsending var hafin þegar beðið var eftir Sigurði Inga Jóhannssyni á Fundi fólksins í dag. „Hvar látum við þennan feita vera?“ spurði Arnar þau Katrínu Jakobsdóttur og Óttarr Proppé en hann stýrði umræðum stjórnmálaflokkanna á fundinum sem var einnig í beinni útsendingu á netinu.
Horfðu á myndbandið hér fyrir ofan.
Fátt var um svör frá Katrínu og Óttarri sem virtust ekki alveg vita hvaðan á sig stóð veðrið. „Ég segi, hvar eigum við að koma honum fyrir, þessum feita?“ spurði Arnar Páll svo þegar Katrín spurði hvort von væri á fulltrúa Framsóknarflokksins.
Uppfært kl. 21.18: Á Vísi kemur fram að Arnar Páll hafi hringt í Sigurð Inga og beðið hann innilegrar afsökunar á þessu. „Hann tók því bara mjög vel og ég met hann mjög mikils sem stjórnmálamann. Þetta voru hrapaleg mistök,“ segir Arnar Páll í samtali við Vísi.