Myndskeið af heimafæðingu sem ljósmóðirin Lisa Marie Sanchez Oxenham deildi á Facebook-síðu sinni hefur vakið gríðarlega mikla athygli. Búið er að horfa oftar en 16 milljónum sinnum á það eftir að því var deilt fyrir tíu dögum. Horfðu á myndbandið hér fyrir neðan.
Myndskeiðið sýnir konu og mann í laug sem notuð er við fæðingar. Eftir stutta stund finnur konan fyrir samdrætti og nokkrum andartökum síðar kemur barnið niður í laugina. Konan grípur barnið og tekur það í fangið. Virðist vera frekar einfalt!
Líkt og kemur fram í frétt BBC, sem fjallaði um myndskeiðið, var höfuð barnsins komið út úr leggöngum móðurinnar fyrir síðasta samdráttinn. Ljósmóðirin sagði konunni að bíða eftir næsta samdrætti og þá kom barnið. Fæðingin gekk vel og tók fljótt af.
Ljósmóðirin er ekki hissa að myndskeiðið af fæðingunni hafi vakið svona mikla athygli. Augnablikið hafi verið fallegt og andrúmsloftið afslappað. „Það er ekki eitthvað sem við tengjum við fæðingu lengur og sjáum svo sannarlega ekki nóg af í dag.“