Búist er við stormi við suðvesturströndina og á miðhálendinu í kvöld. Búast má við vindkviðum allt að 46 m/s við fjöll á sunnanverðu landinu. Draga fer úr vindi á höfuðborgarsvæðinu um miðnætti í kvöld.
Í hugleiðingum veðurfræðings á Veðurstofu Íslands segir:
Í dag nálgast kröpp og dýpkandi lægð sunnan úr hafi og fer þá jafnframt að hvessa af suðaustri. Í kvöld verður kominn stormur við suðurströndina og síðar einnig vestanlands og ættu vegfarendur því að hafa varann á ef þeir eru á ferð undir Eyjafjöllum í kvöld.
Það rignir víða á landinu næsta sólarhring en helst þó yfirleitt þurrt norðaustanlands. Dregur síðan smá saman úr vindi og úrkomu á morgun en gengur ekki niður á Snæfellsnesi fyrr en seint annað kvöld.