Mikið magn af fíkniefnum fannst um borð í grænlenska togaranum Polar Nanoq í nótt þegar leitað var í skipinu vegna rannsóknarinnar á hvarfi Birnu Brjánsdóttur.
Starfsmenn embættis tollstjóra fóru um borð í skipið í Hafnarfjarðarhöfn og fundu efnin. Samkvæmt heimildum RÚV var fjórði skipverjinn færður til yfirheyrslu í nótt vegna þessa anga málsins sem tengist ekki hvarfs Birnu með beinum hætti.
Sjá einnig: Tveir skipverjar á Polar Nanoq úrskurðaðir í gæsluvarðhald í tvær vikur, neita báðir að eiga þátt í hvarfinu
Ekki liggur fyrir hvort skipverjinn sé enn í haldi lögreglu.
Grímur Grímsson yfirlögregluþjónn segir í samtali við mbl.is að að í augnablikinu sé litið svo á að um tvö aðskilin mál sé að ræða, fíkniefnafund og mannshvarf.
Tveir skipverjar af grænlenska togaranum Polar Nanoq hafa verið úrskurðaðir í tveggja vikna gæsluvarðhald. Héraðsdómur Reykjaness varð við beiðni lögreglunnar á höfuðborgarsvæðinu um gæsluvarðhald en hafnaði því að úrskurða mennina í fjögurra vikna varðhald.
Mennirnir tveir eru grunaðir um refsiverða háttsemi í tengslum við hvarf Birnu Brjánsdóttur, tvítugrar konu sem saknað hefur verið síðan á laugardag.
Líkt og áður hefur komið fram voru mennirnir báðir handteknir rétt eftir hádegi í gær um borð í skipinu.
Þeir voru færðir til yfirheyrslu á lögreglustöðinni við Hverfisgötu eftir að Polar Nanoq lagði að bryggju í Hafnarfjarðarhöfn í gærkvöldi. Yfirheyrslur yfir þeim stóðu yfir til klukkan átta í morgun. Haldið verður áfram að yfirheyra þá í dag.
Þriðji maðurinn var handtekinn um borð í togaranum síðdegis í gær. Yfirheyrslur yfir honum hófust kl. 8 í morgun en ekki hefur verið ákveðið hvort farið verði fram á gæsluvarðhald yfir honum.