Björgunarsveitarfólk hefur fundið fimm iPhone-farsíma við leit sína að Birnu Brjánsdóttur í dag. Leitað er á 2.500 ferkílómetra svæði á suðvesturhorni landsins.
Sími Birnu, sem er af þessari gerð, hefur ekki fundist en hann er einn af þeim hlutum sem leitað er að í dag.
Sjá einnig: Býður björgunarsveitarfólki sem tekur þátt í leitinni frían mat, kaffi og kakó á Prikinu
570 björgunarsveitarmenn leita Birnu og hófu störf kl. 9 í morgun. Aðaláherslan er lögð á Reykjanesskagann, Heiðmörk, Hafnarfjall, Kaldársel og nokkur vel valin svæði í kringum Hafnarfjörð.
Lögreglu hefur ekki tekist að kortleggja ferðir rauða Kia Rio bílssins sem annar grænlensku skipverjanna sem eru í gæsluvarðhaldi leigði síðustu helgi.
Sjá einnig: Óku um stíga og slóða til að kanna hvert skipverjinn gæti hafa farið
Hann sést fara út af hafnarsvæði Hafnarfjarðarhafnar kl. 7 síðastliðinn laugardag og koma aftur inn á það um kl. 11.30.
Ásgeir Þór Ásgeirsson yfirlögregluþjónn segir í samtali við RÚV að leitin hafi tæknilega séð gengið mjög vel í dag en ekkert hafi fundist sem þeir geti sagt að tengist rannsókn málsins með óyggjandi hætti.
Um leið og einhver hlutur verðu á vegi leitarmanna taka þeir mynd og senda sérstakri greiningardeild sem vinnur úr þeim upplýsingum.
Nútíminn hefur tekið saman lista yfir það sem við vitum um grænlensku skipverjana sem eru í gæsluvarðhaldi.