Ásta Guðrún Helgadóttir, þingmaður og þingflokksformaður Pírata, kallaði Donald Trump Bandaríkjaforseta fasista í ræðustól Alþingis í sérstakri umræðu um stjórnmálaástandið í Bandaríkjunum í dag.
„Við þurfum að nota rétt orð þegar þau eiga við. Gífuryrði er eitt orð sem hæstvirtur utanríkisráðherra vill ekki nota. En það er mikilvægt að við notum orð og notum orðin rétt og þorum að nota orðin þegar þau eiga við,“ sagði Ásta Guðrún.
Hún sagði það lykilatriði í umræðunni og nefndi næst það orð sem henni finnst lýsa best stjórnarháttum Trumps.
Donald Trump er fasisti, það er bara þannig.
„Það er rétt orð til að lýsa hans nokkurra daga setu sem Bandaríkjaforseti, það er rétt orð til að lýsa þeim atburðum sem hana átt sér stað innan Bandaríkjanna, það er rétt orð til að lýsa þeirri vanvirðingu við mannréttindi, kvenréttindi, alþjóðaskuldbindingar, fólk og önnur lönd. Notum rétt orð þegar þau eiga við, Donald Trump er fasisti,“ sagði Ásta Guðrún einnig.
Notum rétt orð þegar þau eiga við. Donald Trump er fasisti.
— Ásta Helgadóttir (@asta_fish) January 31, 2017