Birna Brjánsdóttir var á lífi í rauða Kia Rio bílnum á höfninni í Hafnarfirði að morgni laugardagsins 14. janúar. Þetta kemur fram í Fréttablaðinu í dag. Fréttablaðið greinir frá því að Birnu hafi ekki verið unnið mein fyrr en eftir að skipverjinn, sem sat í gæsluvarðhaldi í tvær vikur grunaður um aðild að málinu og var sleppt í síðustu viku, var farinn um borð í togarann Polar Nanoq.
Eins og greint hefur verið frá í fjölmiðlum þá sést rauði Kia Rio bíllinn í eftirlitsmyndavélum Hafnarfjarðarhafnar klukkan rúmlega sex um morguninn. Nikolaj Olsen og Thomas Møller Olsen sjást koma út úr bílnum, ræða saman í stutta stund áður en Nikolaj fer um borð í skipið.
Thomas keyrir hins vegar á enda bryggjunnar og er þar í um 50 mínútur áður en hann ekur burt af hafnarsvæðinu. Reynt hefur verið að rekja ferðir hans til um 11.30 sama dag.
Fréttablaðið greinir frá því að Nikolaj hafi greint frá málavöxtum og að lögregla telji að hann hafi ekkert með morðið á Birnu að gera. Í umfjöllun Fréttablaðsins kemur fram að lögregla gangi nú út frá því að Birnu hafi verið unninn mestur miski á bryggjusporðinum við Hafnarfjarðarhöfn á milli 6.10 og 7 að morgni þegar Thomas Møller Olsen var einn með henni í bílnum.