Ástarlíf Íslendinga virðist samofið pizzuáti ef marka má Valentínusardaginn á Domino’s. Þriðjungur þeirra sem pöntuðu pizzur í gær óskuðu eftir að þær yrðu hjartalaga, að álegginu yrði raðað í hjarta eða að hjarta yrði teiknað í kassann.
Anna Fríða Gísladóttir, markaðsstjóri Domino’s á Íslandi, segir í samtali við Nútímann að það sé að sjálfsögðu alltaf reynt að fara eftir þessum óskum. „En við verðum að tryggja að við uppfyllum þjónustuloforð okkar um afhendingartíma,“ segir hún.
Því getum við því miður ekki alltaf gert hjartapizzur því þær taka meiri tíma sem bitnar á afhendingartímum okkar.
Heppnir viðskiptavinir fengu þó óskir sínar uppfylltar, eins og myndirnar hér fyrir ofan sína.
En jafnvel langsóttari beiðnir hafa borist að sögn Önnu Fríðu sem rifjar upp þegar viðskiptavinur óskaði eftir því að tveggja lítra Kókflaska yrði opnuð, trúlofunarhringur settur ofan í og flaskan svo afhent með pizzunni. „Hann ætlaði að biðja konunnar sinnar með Domino’s máltíð því þau elska Domino’s!“
Þá höfðu eitt sinn vinkonunar brúðar samband þar sem þær ætluðu að græja herbergi fyrir brúðhjón um brúðkaupsnóttina. „Brúðhjónin eru miklir aðdáendur Domino’s og hugmyndin var að útbúa hjartapizzu fyrir þau að gæða sér á þegar þau kæmu heim um nóttina,“ segir Anna Fríða.
„Ég gerði prufur með einni vinkonu brúðarinnar og hún kom með hjartalaga mót sem við gátum notað til að skera út hjartalaga skinku- og pepperónísneiðar. Vinkonurnar sögðu mér að þetta hefði slegið í gegn enda brúðhjónin svöng eftir allan dansinn um nóttina. Þau voru hæst ánægð að geta fengið uppáhalds skyndibitann sinn um brúðkaupsnóttina.“