Sjávarútvegsfyrirtækið Skinney Þinganes ætlar að stofna kaffihús og skemmtistað á Höfn í Hornafirði í von um að halda unga fólkinu í bænum. „Við erum að hugsa um yngra fólkið,“ segir Ásgeir Gunnarsson, framkvæmdastjóri hjá fyrirtækinu í samtali við mbl.is um málið.
Sífellt fleiri ferðamenn heimsækja bæinn og segir í frétt mbl.is að þeim hafi fjölgað hraðar en veitingahúsunum sem séu svo þétt setin að takmarkað svigrúm hefur verið til skemmtanahalds fyrir heimamenn.
„Okkur barst til eyrna að það væri lítið um staði þar sem ungt fólk gæti komið saman,“ segir Ásgeir. Samstaða var um að ráðast í framkvæmdirnar að sögn Ásgeirs enda þurfi sveitarfélagið á ungu fólki að halda, ekki síst yfir sumarið.
Stefnt er að því að opna staðinn í júní í sumar og verður hann í gamla Kartöfluhúsinu niðri við höfn.