Gjafakassi með bleikum pela og snuði frá Nuk er 340 krónum dýrari en alveg eins kassi með bláum pela og snuði í Krónunni úti á Granda í Reykjavík. Bleika settið kostar 1.990 krónur en það bláa 1.659 krónur.
Þetta kemur fram í frétt RÚV en þar er vísað í mynd Ómars R. Valdimarssonar sem var tekin 29. apríl sl. Engar skýringar hafa fengist á verðmuninum hjá Krónunni.
Mikið hefur verið fjallað um hugtakinn bleikan skatt en vörur sem ætlaðar eru konum eru oft dýrari en samskonar vörur fyrir karla. Þetta á til dæmis við um rakvélarblöð og raksápu.
Uppfært kl. 16.25
„Þetta var mannleg yfirsjón,“ segir Sigurður Markússon, framkvæmdastjóri innkaupadeildar hjá Kaupási, í samtali við RÚV. Hann segir að blái pelinn hafi lækkað í verði frá birgja og þar sem kerfið hjá Krónunni sé sjálfvirkt hafi verðið aðeins lækkað á bláu pelunum.
Sigurður segir að búið sé að bregðast við með því að lækka einnig verðið á bleiku pelunum. „Það er engin bleik verðlagning í Krónunni. Þetta var klaufalegt en gott dæmi um hvað neytendur eru vakandi og hvernig nútímatækni verður til þess að brugðist er hratt við.“