Draymond Green, leikmaður NBA liðsins Golden State Warriors, var alls ekki sáttur við mynd sem birtist af bardagakappanum Conor McGregor. Á umræddri mynd klæðist Conor treyju Golden State með númerinu 23 en það er númer Green hjá liðinu. Green var ekki sáttur við það og sagði á Instagram síðu sinni að leikmenn Warriors styddu við bakið á Floyd Mayweather en hann og Conor munu eigast við í boxbardaga í Las Vegas 26. ágúst nk.
Green var hinsvegar ekki ástæðan fyrir því að Conor klæddist treyju nr. 23 heldur var hann að skjóta á andstæðing sinn Floyd Mayweather. Conor skartaði treyju C.J. Watson sem einnig spilaði númer 23 fyrir Golden State á árunum 2007 til 2010. Watson þessi átti vingott við fyrrum kærustu Floyd, Josie Harris, árið 2010. Floyd gekk í skrokk á henni eftir að hún viðurkenndi að hafa átt í ástarsambandi við CJ. Hann var í kjölfarið dæmdur í 90 daga fangelsi.