Leiklistarneminn Vilhelm Neto birti tíst á Twitter í gær þar sem hann sagði draum sinn vera að fá að kynna stigin fyrir Ísland í Eurovision, sem fer fram í Portúgal í maí. Vilhelm er hálfur Portúgali og hálfur Íslendingur og tístið hefur vakið mikla athygli.
Það sem ég myndi ekki gefa til að fá að kynna stigin fyrir Ísland í Portúgalska Eurovision.
Fæ gæsahúð bara að ýminda mér það.— Vilhelm Neto (@VilhelmNeto) February 15, 2018
Ekki hefur verið gefið upp hver kynnir stigin fyrir Íslands hönd og fjölmargir skora á RÚV að fá Vilhelm í verkið. Vilhelm segir í samtali við Nútímann að það væri yndislegt að geta sameinað Ísland og Portúgal með þessum hætti. „Ég og fjölskyldan horfðum alltaf saman á Eurovision,“ segir hann.
Svo var einhvern veginn alltaf svo nett að fylgjast með hver var að kynna — það hefur svo frábært fólk kynnt stigin.
Föðurætt Vilhelms er frá Portúgal og ólst hann þar upp þangað til hann flutti til Íslands árið 2007. Í öðru tísti segir hann að „það væri líka svo stórt fokk jú til allra sem lögðu mig í einelti í grunnskóla þar“ að fá að kynna stigin. Hann segir að þó það yrði 100% aukabónus þá myndi þetta snúast meira um að sameina ást hans á Eurovision, Portúgal og Íslandi. „Heilaga þrenningin,“ segir hann.
Vilhelm segist vera ringlaður yfir þessum miklu viðbrögðum sem bón hans hefur fengið. „Ég er hálf orðlaus. Glotti bara allan daginn.“