Snæbjörn Brynjarsson, rithöfundur og Pírati, benti á það á Twitter í dag að Eyþór Arnalds var 100% ósammála því að leggja ætti aukna áherslu á uppbyggingu félagslegs húsnæðis í kosningaprófi RÚV fyrir borgarstjórnarkosningar í vor.
Í gær var haldinn neyðarfundur í borgarstjórn vegna málefna heimilislausra í Reykjavík. Í tilkynningu frá Sjálfstæðisflokknum í morgun er lýst yfir vonbrigðum með fundinn.
„Það er afar brýnt að við bregðumst við vandanum strax og komum upp færanlegu húsnæði hið fyrsta, s.s. smáhýsum fyrir ólíka hópa húsnæðislausra til bregðast við neyð heimilislausra á meðan verið er að finna varanlegar lausnir, hvort heldur sem það eru einstaklingar eða fjölskyldur,“ segir Eyþór Arnalds í tilkynningunni.
Snæbjörn segist vera ósannfærður um áhuga hans á málefnum heimilislausra og vitnar í kosningapróf RÚV, sem Eyþór Arnalds svaraði sjálfur, líkt og aðrir frambjóðendur, fyrir kosningar.
Samkvæmt kosningaprófi RÚV var Eyþór Arnalds andvígur auknu félagslegu húsnæði. Hann svaraði prófinu sjálfur eins og aðrir frambjóðendur. Hann er mjög andvígur. Þessvegna er ég mjög ósannfærður um áhuga hans á málefnum heimilislausra. pic.twitter.com/oqfW539ekG
— Snæbjörn? (@artybjorn) August 1, 2018