Inga Sæland lætur Ólaf og Karl heyra það: „Karlar sem eiga afar erfitt með að sæta því að hlíta stjórn sterkrar konu“

Inga Sæland, formaður Flokks fólksins, lætur þá Ólaf Ísleifsson og Karl Gauta Hjaltason heyra það í aðsendri grein sem birtist í Morgunblaðinu í dag undir yfirskriftinni „Karlar sem hatast við konur“.

Inga skrifar um kvöldið á Klaustri Bar og segir að Ólafur og Karl hafi aðeins átt eitt erindi þangað og það hafi verið að svíkja flokkinn sem kom þeim á þing.

Hún segir það hafi verið kaldhæðnislegt að lesa gagnrýni Ólafs um stjórnarhætti innan Flokks fólksins. Hann sagði að fólki sem starfaði innan hans stafaði mikil orðsporshætta af þeirri skipan mála sem uppi væri.

„Þarna tal­ar maður sem ný­verið hef­ur full­kom­lega að eig­in frum­kvæði og hvöt­um eyðilagt eigið orðspor sem stjórn­mála­maður með því að taka þátt í sam­særi sem hef­ur kastað rýrð á æru þings og þjóðar. Ólaf­ur Ísleifs­son og Karl Gauti Hjalta­son fé­lagi hans eru nú farn­ir í sögu­bæk­urn­ar sem fyrstu þing­menn lýðveld­is­sög­unn­ar sem eru látn­ir sæta ábyrgð fyr­ir gjörðir sín­ar með því að þeir eru rekn­ir úr sín­um eig­in flokki fyr­ir af­brot sín.“

Inga segir að það sé gömul saga og ný, bæði í pólitík og atvinnulífi, að til séu karlar sem eiga afar erfitt með að sæta því að hlíta stjórn sterkrar konu.

„Þeir láta engin tækifæri ónotuð til að freista þess að grafa undan slíkum konum. Gera þær tortryggilegar með baknagi, dylgjum, ósannindum og hreinni illmælgi; hatri og heift“.

Þá segir hún að gagnrýni vegna fjármála Flokks fólksins eigi ekki rétt á sér. Flokkurinn hafi framan af barist í bökkum fjárhagslega og frá fyrsta degi hafi verið gætt ýtrustu ráðdeildar þar sem öllu hafi skipt að hafa fullkomna yfirsýn degi til dags. Þetta hafi tekist farsællega og flokkurinn búi nú við heilbrigðan fjárhag.

„Hann er skuld­laus og slíkt er afar fátítt meðal ís­lenskra stjórn­mála­flokka í dag. Reikn­ing­ar flokks­ins hafa aldrei hlotið at­huga­semd­ir end­ur­skoðenda og þeim hef­ur verið skilað í sam­ræmi við lög og regl­ur. Þeir hafa ávallt verið opn­ir öll­um stjórn­ar­mönn­um, líka Karli Gauta Hjalta­syni. Hall­dór Gunn­ars­son sat í stjórn og þriggja manna fjár­hags­ráði flokks­ins, var með aðgang og eft­ir­lits­heim­ild að heima­banka flokks­ins. Hann und­ir­bjó árs­reikn­inga ásamt gjald­kera í hend­ur lög­gilts end­ur­skoðanda. Hall­dór Gunn­ars­son vissi um öll fjár­mál Flokks fólks­ins frá A til Ö. Það er aumt að horfa upp á Hall­dór, Karl Gauta og Ólaf í hefnd­ar­leiðangri nú þar sem þeir reyna að sá fræj­um efa­semda og tor­tryggni um fjár­mál Flokks fólks­ins um leið og þeir vita bet­ur,“ skrif­ar Inga en grein­ina er hægt að lesa í heild sinni í Morg­un­blaðinu í dag.