Katrín Tanja Davíðsdóttir segir að Crossfit íþróttin hafi hjálpað henni að læra að elska líkama sinn. Katrín Tanja verður á meðal íþróttafólks sem mun sitja nakið fyrir í einu frægasta íþróttablaði Bandaríkjanna í næsta mánuði, The Body Issue Espn.
Katrín Tanja ræddi myndirnar í viðtali við netsíðuna Morning Chalkup. Þar segir hún að hún hafi lengi verið aðdáandi Body Issue og skoði það á hverju ári.
Hún talar um hvernig Crossfit hafi hjálpað henni að kunna að meta líkama sinn sem hún hefur unnið svo mikið í. Sem fimleikakona hafi hún oft viljað að líkaminn hennar væri öðruvísi. Þrátt fyrir að hún standi sig enn að því af og til þá hafi hún lært að meta hann.