Fréttir
Jökull Júlíusson – söngvari hljómsveitarinnar Kaleo – sat nýverið fyrir spurningum útvarpskonunnar DJ K-Lo frá Rhode Island (sjá hér fyrir ofan) eftir tónlistarhátíðina Lollapalooza sem fór fram í byrjun ágúst í Chicago.
Aðspurður hvort að aðdáendur Kaleo mættu búast við nýrri tónlist frá hljómsveitinni á næstunni sagðist hann vonast eftir því að komast í hljóðverið í desember eða janúar.
Um miðbik myndbandsins lagði K-Lo nokkrar hraðaspurningar fyrir Jökul og var hann meðal annars spurður út í það hvað hann væri að gera ef hann væri ekki tónlistarmaður (ca. 02:10); svarið kom spyrlinum svolítið á óvart.
„Ég væri líklegast sjúkraþjálfari … Áður en Kaleo komst á flug gældi ég við þessa hugmynd.“
– Jökull Júlíusson
Kaleo er á miklu flugi um þessar mundir en ásamt því að túra um Bandaríkin í lok ágúst og byrjun september hitar sveitin upp fyrir Rolling Stones í Austurríki í haust.
Nánar: https://www.ruv.is/frett/kaleo-…
Hér fyrir neðan má svo sjá myndband frá dansaranum Rachael Lust þar sem hún leikur listir sínar með húlahoppgjörð við lagið No Good eftir Kaleo.