Þorgeir Eyjólfsson, fyrrverandi forstjóri Lífeyrissjóðs verzlunarmanna, hefur síðustu misseri skrifað fjölmargar greinar í Morgunblaðið um meinta skaðsemi Covid-bóluefna ásamt því að halda úti nánast daglegu bloggi um viðfangsefnið.
Þann 3. júní síðastliðinn birtist til dæmis grein eftir Þorgeir og Helga Örn Viggósson kerfisfræðing um nýútkomna japanska rannsókn, þá stærstu til þessa, þar sem tengsl á milli Covid bólusetninga og sex tegunda krabbameina eru sögð staðfest.
Í dag skrifar Þorgeir bloggfærslu þar sem hann skorar á þingmennina Jakob Frímann Magnússon og Tómas Tómasson að opna á umræðuna um meinta skaðsemi Covid bóluefna og hvetur þá til að gera málið að sínu á Alþingi Íslendinga.
„Það eru ófáar fjölskyldurnar á Íslandi sem eiga um sárt að binda vegna bóluefnanna og myndu fagna framtaki þeirra“
Athygli vekur að Þorgeir gerir það að umtalsefni að báðir þingmennirnir séu komnir á eftirlaunaaldur, eins og Þorgeir sjálfur, og ættu því að hans sögn að geta tekist á við kerfið án ótta við atvinnumissi og útskúfun.
Hann virðist þannig telja að þingmenn á besta aldri sem gætu þurft að leita sér að vinnu eftir að þingmennsku sleppir séu ekki frjálsir skoðana sinna og kunni að gjalda fyrir þær þegar fram í sækir. Slík séu áhrif lyfjaframleiðenda að mati Þorgeirs og þeirra sem gæta hagsmuna þeirra innan íslenskrar stjórnsýslu.
Birtir hann súlurit með færslu sinni sem sýnir árlegan fjölda tilkynninga um hjartavöðvabólgur í kjölfar bólusetninga í bandaríska VAERS gagnagrunninn og segir að skaði mRNA covid bóluefnanna á hjartað geti ekki verið skýrari þegar horft er til fjölgunnar tilkynninga í gagnagrunninum síðan 2021 eða sama árið og mRNA bólusetningarnar hófust.
Lyfjastofnun Íslands hafði tekið við rúmlega 6.000 tilkynningum um aukaverkanir, þar af 360
alvarlegum samkvæmt þessari frétt RÚV, áður en uppfærslu á slíkum tilkynningum var hætt af ókunnum ástæðum.
Í súluriti sem stofnunin birtir (tilkynningar sendar í EudraVigilance) má sjá að 190 tilkynningar varða hjartað og 161 æðakerfið.
Þorgeir fullyrðir að lokum að utan þings væri hópur sérfræðinga tilbúinn að leggja þingmönnunum til gögn og niðurstöður fjölda rannsókna sem sögð eru staðfesta skaðsemi efnanna auk þess að sá hópur hafi aðgang að þekktum erlendum læknum sem væru tilbúnir að aðstoða væri þess óskað.
Súluritið úr VAERS gagnagrunninum má sjá hér:
