Sýn sendi nýlega frá sér afkomuviðvörun og gerir ráð fyrir um 30% lægri rekstrarhagnaði á árinu 2024 en áður var gert ráð fyrir. Áætlað er að rekstrarhagnaður félagsins verði um 700 millj. kr. en áður var áætlað að rekstrarhagnaður myndi verða á bilinu 900 – 1.100 millj. kr. Auglýsingatekjur eru 258 millj. kr. undir áætlun og áskriftartekjur af sjónvarpsmiðlum 106 mill. kr. undir áætlun. Hlutabréfaverð í Sýn tók dýfu og hefur nú þegar lækkað um 27% það sem af er ári. Þá lækkaði hlutabréfaverð í Sýn um rúm 32% á síðasta ári.
Sýn er aðallega á fjölmiðla- og fjarskiptamarkaði en birtir ekki starfsþáttayfirlit þannig að erfitt er að átta sig á þróun afkomu fjölmiðlahluta Sýnar. Flest félög sem eru skráð á hlutabréfamarkaði birta starfsþáttayfirlit þegar þau eru með fjölþætta starfsemi til að stuðla að góðri upplýsingagjöf til fjárfesta.
Stöðugt lækkandi traust til fjölmiðla
Það er ekki bara á íslandi þar sem hinir svokölluðu meginstraumsfjölmiðlar (e.mainstream media) eiga undir högg að sækja. Vegna samdrátts í tekjum hafa stórir fjölmiðlar eins og CNN, Los Angeles Times og The Washington Post sagt upp hundruðum starfsmanna á undanförnum mánuðum. Þá hafa fjölmargir aðrir fréttamiðlar tilkynnt um uppsagnir eða fyrirhugaðar uppsagnir.
Rekstrarumhverfi meginstraumsfjölmiðla hefur ávallt verið krefjandi en að undanförnu hefur staða þeirra versnað hratt samfara minna trausti almennings til þeirra. Nýleg könnun Gallup leiddi í ljós að um 70% Bandaríkjamanna bera lítið eða ekkert traust til svokallaðra meginstraumsfjölmiðla. Áhorf og lestur á meginstraumsfjölmiðlum fer sífellt lækkandi og fólk leitar í sí auknum mæli til nýmiðla á netinu, hlaðvörp og efnisveitur eins og Substack eða X (áður Twitter) til að fá áreiðanlegar fréttir. Þar eins og annars staðar skiptir máli að nota hyggjuvitið og finna út hverjir eru traustsins verðir.
Einhliða umfjallanir megin orsök hnignunar
Sérfræðingar eins og Jay Rosen frá New York University hafa bent á að fjölmiðlar þurfi að endurskoða vinnubrögð sín ef þeir vilja endurheimta traust almennings. Þeir viðmælendur sem Nútíminn ræddi við töldu að helstu ástæður hnignunar meginstraumsmiðla væru einhliða umfjallanir þeirra um ákveðin málefni. Að þeir sem vildu benda á önnur sjónarmið væru ýmist þaggaðir niður eða skammaðir opinberlega af fjölmiðlum og handvöldum álitsgjöfum þeirra. Má þar nefna gagnrýni á aðgerðir stjórnvalda í Covid faraldrinum, stríð Rússlands og Úkraníu, kynjamál og óheftan innflutning velferðarflóttamanna. Bent var á að öll framangreind málefni hafi verið þjóðarbúinu dýr og að þau muni hafa mikil og neikvæð áhrif á velferðarkerfi þjóðarinnar. Einnig hafi fólk haft á orði að það verði börn okkar sem muni bera mestan skaðann af vanhugsuðum aðgerðum eða aðgerðarleysi stjórnvalda sem fær að viðgangast án nokkurrar gagnrýni frá meginstraumsfjölmiðlum.
Kostnaður af óráðsíu undanfarinna ára er enn sem komið er tekinn að láni hjá stjórnvöldum og léleg menntun barna hefur áhrif framtíðar velferð þeirra og styrkleika atvinnulífsins á komandi áratugum. Þá benti Ásgeir Jónsson seðlabankastjóri á í viðtali á árinu 2021 að Seðlabankinn myndi hækka vexti ef ríkisstjórnin myndi ekki hætta hallarekstri. Það gekk ekki eftir með þeim afleiðingum að Íslendingar hafa búið við hávaxtastefnu með tilheyrandi skaða fyrir samfélagið og þá sérstaklega ungt fólk með há húsnæðislán. Ljóst er að mikið verk bíður meginstraumsmiðlanna vilji þeir endurheimta það traust sem almenningur sýndi þeim áður.