Hópur barna frá Úganda endurskapaði eitt óhugnalegasta atvik síðari tíma í sögu Bandaríkjanna – þegar hinn tvítugi Thomas Matthew Crooks reyndi að ráða Donald J. Trump af dögum.
Myndskeiðið hefur farið eins og eldur í sinu um veraldarvefinn undanfarna daga en það hefur vakið bæði kátínu og reiði netverja. Hvað sem því líður þá hafa tugmilljónir einstaklinga úti um allan heim horft á það – bæði á samfélagsmiðlinum X og á TikTok, þar sem það birtist fyrst.
Vakið athygli um heim allan
Myndskeiðið sýnir barn í hlutverki Trump að ávarpa gesti fundarins. Börnin frá Úganda notuðu upprunalega hljóðupptöku frá skotárásinni sem, líkt og flestir vita, var í beinni útsendingu á nokkrum bandarískum sjónvarpsstöðvum aðfaranótt sunnudags. Fjöldi netverja hefur hrósað börnunum fyrir framúrskarandi leik og þá hafa nokkrir þekktir Repúblikanar nýtt sér tækifærið og deilt myndskeiðinu á samfélagsmiðlum með setningunni: „Vinstra liðið fær aldrei að gleyma þessu!“
Fjöldi barna tekur þátt í „leikritinu“ en þar sjást nokkur þeirra leika starfsmenn leyniþjónustu Bandaríkjanna. Það vantar ekki ímyndunaraflið en börnin nota spýtur sem byssur en líkt og sést í hinni raunverulegu skotárás var Trump umkringdur af starfsmönnum „Secret Service“ stuttu eftir að skothljóðin heyrðust.
Sjón er sögu ríkari og rúmlega það!