Helgi Magnússon og fleiri aðilar hafa keypt helmings eignahlut 365 miðla í Torgi ehf. En félagið er útgáfufélag Fréttablaðsins og starfrækir meðal annars vefmiðilinn frettabladid.is. Helgi keypti fyrr á þessu ári helmingshlut í Torgi og hafa 365 miðlar nú selt allt hlutafé sitt í félaginu.
Fyrirhugað er að sameina rekstur Fréttablaðsins og sjónvarpsstöðvarinnar Hringbrautar. Ólöf Skaftadóttir ritstjóri Fréttablaðsins mun láta af störfum en hún sagði upp í ágúst. Jón Þórisson, fyrrverandi forstjóri VBS fjárfestingabanka og fyrrverandi aðstoðarforstjóri Íslandsbanka, hefur verið ráðinn ritstjóri og ábyrgðarmaður blaðsins við hlið Davíðs Stefánssonar.
Þetta kom fram á vef Fréttablaðsins.