Einn vinsælasti poppsöngvari síðari tíma, hinn kanadíski Justin Bieber, er sagður líða ömurlega. Þeir sem þekkja til og sáu hann til að mynda koma fram í brúðkaupi hjá syni ríkasta manns Indlands segja hann hafa litið út fyrir að vera þreyttur, útkeyrður og stressaður. Þá á hann að hafa aukið drykkju sína samhliða því og af þessu hafa vinir og ættingjar áhyggjur.
Hann flaug í tuttugu klukkutíma frá Los Angeles til Mumbai í Indlandi, tróð upp í nokkra klukkutíma og brunaði svo beinustu leið aftur upp á flugvöll og flaug heim til þess að vera hjá óléttri eiginkonu sinni Hailey Bieber
Til hvers þurfti hann peningana?
Samkvæmt heimildum DailyMail fékk söngvarinn 10 milljónir dollara fyrir giggið í Indlandi en það samsvarar rúmum 1,3 milljarði íslenskra króna. En sú spurningur sem brennur á vörum flestra er af hverju þessi vellauði listamaður hafi ákveðið að fara alla þessa leið til Mumbai, frá óléttri eiginkonu sinni, þegar auðæfi hans eru sögð metin á yfir 300 milljónir dollara eða rúma 39 milljarða íslenskra króna.
DailyMail segist hafa heimildir fyrir því að ástæðan sé sú að eiginkona Beibers sé algjör eyðslukló.
„Hún er rosaleg þegar það kemur að því að versla. Hún hefur eytt tugum milljóna dollara í einkaþotu til að fljúga um heiminn – í eitt skiptið leigði hún einkaþotu bara til að fljúga heimshorna á milli til að fá neglurnar sínar gerðar hjá ákveðnum naglameistara,“ sagði heimildarmaður í innsta hring Biebers við DailyMail.
Misst allt sjálfstraust og sköpunargleði
Þá segja þeir sem þekkja til að Bieber sé ekki sá sami og hann var hér einu sinni. Hailey hafi einangrað hann frá vinum og fjölskyldu sem hafi leitt til gríðarlegrar óhamingju. Þetta hafi orðið til þess að hann hafi misst allt sjálfstraust, alla sköpunargleði og að enginn innblástur sé lengur til staðar til að skapa tónlist.
Sú lýsing er ekki sögð eiga við hinn kokhrausta tólf ára gamla dreng sem steig fyrst á svið árið 2009 og frumflutti lagið sitt „One Time.“ – Ef við spólum hratt til dagsins í dag þá hefur Bieber ekki gefið út plötu síðan 2021 og ekki farið í tónleikaferðalag í rúm tvö ár eða frá því hann blés af „Justice“ tónleikaferðalag sitt vegna heilsubrests.
En það var ekki eina uppákoman sem kom vinum og vandamönnum hans í opna skjöldu heldur tilkynnti hann stuttu seinna, eða í janúar 2023, að hann hygðist selja réttindin af öllum 291 útgefnum lögum sínum. Fjárfestingarfyrirtækið „Hipgnosis Songs Capital“ er sagt hafa keypt öll verk Biebers fyrir tvö hundruð milljónir dollara í staðgreiðslu en í staðinn fær Bieber ekki lengur „stefgjöld“ af lögum sínum – af öllum þeim lögum sem hann gaf út fyrir 31. desember 2021.
Flestir selja í lok ferilsins
DailyMail segir að flestir farsælir tónlistarmenn leitist ekki við að selja höfundarrétt sinn fyrr en í lok ferilsins og er það þá gert til að halda áfram að lifa þeim fokdýra lífsstíl sem viðkomandi tónlistarmenn hafa lifað fram til þess dags sem þeir ákveða að stíga út úr sviðsljósinu.
„Bieber var ráðlagt frá því að selja en Hailey lék lykilhlutverk í því að sannfæra hann um að gera það,“ segir heimildarmaður við DailyMail.
Í maí endurnýjaði parið brúðkaupsheiti sín á Hawaii en við sama tækifæri tilkynnti Hailey að hún væri ófrísk. Þá sýndi hún við sama tilefni glænýjan 18-kara demantshring sem er sagður hafa kostað 1,5 milljónir dollara. Hún er sögð hafa keypt hringinn til þess að geta parað hann saman við hinn trúlofunarhringinn sinn sem er 10-karöt og er metinn á um 600.000 dollara.
Hailey ber nú báða hringi á fingrum sér. Dýrt spaug að týna þeim.
Erfingi í þessum mánuði?
Aðdáendur söngvarans telja í tugum milljóna út um allan heim og má draga þá ályktun að þeir bíði spenntir eftir nýju efni frá söngvaranum sem verður þó að teljast ansi ólíklegt í ljósi þess að hann fær nú brátt nýtt hlutverk sem verður hvorki á sviði né bakvið míkrófóninn…hann verður pabbi.
Fjölmiðar vita ekki nákvæma dagsetningu á keisaraskurði Hailey en segja þó að búast megi við erfingja í þessum mánuði – ágúst 2024.