Mjallhvít og dvergarnir sjö er eitt ástsælasta ævintýri Disney frá upphafi og fyrsta teiknimynd fyrirtækisins.
Það mætti segja að myndin haf lagt grunninn að Disney veldinu eins og við þekkjum það í dag og nú stendur til að endurgera myndina með alvöru leikurum en það hefur sannarlega ekki gengið áfallalaust.
Erfiðleikarnir hófust strax í byrjun þegar aðalleikkona myndarinnar, Rachel Zegler var kynnt til sögunnar en hún passar ekki mjög vel við lýsingu á söguhetjunni sem lýst er með húð eins hvíta og snjó en Zegler er ættuð frá Kólumbíu og er nokkuð brún á hörund.
Talaði niður upprunalegu myndina
Ekki batnaði þar þegar Zegler byrjaði að tala illa um upprunalegu myndina og halda því fram að prinsinn í henni hafi verið eltihrellir fyrir að kyssa Mjallhvíti þar sem hún liggur sofandi.
Hún sagði einnig að það væri heimskulegt að sagan væri ástarævintýri og að slíkt þema passaði ekki við nútíma hugsunarhátt enda væri Mjallhvít sjálf fær um að gera allt sjálf og þyrfti engan til að bjarga sér.
Zegler aflaði sér mikilla óvinsælda en það voru smámunir við háðið sem myndin fékk þegar myndir frá kvikmyndasettinu litu dagsins ljós og „dvergarnir“ sjö voru ekki dvergar heldur „allskonar fólk sem átti að endurspegla heimsmyndina eins og hún er í dag“.
Netverjar og kvikmyndagagnrýnendur gátu ekki haldið aftur af hlátrinum og ljóst var að myndin átti á hallann að sækja áður en tökum var einu sinni lokið svo að Disney ákvað að fresta sýningu myndarinnar.
Disney snýr aftur
Eftir dágóðan tíma byrjaði markaðssetningin að nýju og svo virtist sem Zegler hafi fengið tiltal frá yfirmönnum sínum hjá Disney en hún byrjaði skyndilega að tala afar fallega um fyrri myndina og hélt skoðunum sínum að öðru leyti fyrir sjálfa sig enda óvinsældir hennar taldar stór ástæða fyrir slæmum móttökum myndarinnar.
Nýlega birtist svo stiklan úr myndinni en hún hefur fengið vægast sagt skelfilegar viðtökur og þegar þetta er skrifað er hún með næstum milljón „dislikes“ en einungis 77 þúsund „likes“.
Svo hafa tæknibrellur myndarinnar ekki vakið lukku en dvergarnir eru nú algerlega tölvugerðir og eru sagðir koma mjög illa út við hlið Zegler.
Kom sér strax aftur í vandræði
Til að bæta gráu ofan á svart gat Zegler svo ekki haldið lengur aftur af sér og birti færslu á samskiptamiðlinum X þar sem hún segir að frelsa þurfi Palestínu en mótleikkona hennar í myndinni, Gal Gadot, er frá Ísrael.
Yfirmenn hennar hjá Disney eru sagðir æfir yfir þessu nýjasta uppátæki leikkonunnar en tíminn einn mun leiða í ljós hvernig myndinni mun ganga í kvikmyndahúsum.
Hægt er að horfa á stikluna frægu hér fyrir neðan og dæmi þá hver fyrir sig.