Óskarsverðlaunahafinn Tom Hanks er nýjasta fórnarlamb innbrotsþjófa í Los Angeles en samkvæmt lögreglunni vestanhafs var brotist inn hjá þeim fyrir nokkrum vikum. Þjófarnir brutu gler í gestahúsi á lóð þeirra og er sagt að atvikið hafi átt sér stað um hábjartan dag.
Þegar glerið brotnaði fór öryggiskerfi á allri eigninni í gang en það stöðvaði ekki hina fingralöngu þjófa sem héldu leið sinni áfram inn í gestahúsið. Góðu fréttirnar eru þær að þjófarnir komust EKKI inn í aðalhúsið á lóð þeirra hjóna Hanks og Ritu Wilson.
Samkvæmt heimildum TMZ virðist sem svo að þjófarnir hafi ekki verið að brjótast sérstaklega inn hjá þeim hjónum heldur var eign þeirra ein af mörgum sem voru skotmörk þjófanna en mikið hefur borið á því að brotist sé inn hjá Hollywood-stjörnum og allt hreinsað út – það fylgir þó ekki fréttum hinna vestrænu miðla hverju hafi verið stolið en draga má þá ályktun, miðað við hversu mikla fjármuni þau hjón eiga, að dýrmætir hlutir séu ekki bara í aðalbyggingunni heldur líka í gestahúsi þeirra hjóna.
Hanks og Wilson eru, eins og áður segir, nýjustu fórnarlömb innbrotsþjófa í borg englanna en að undanförnu hefur verið brotist inn til Bhad Bhabie, Söruh Hyland og Marlon Wayans – svo einhverjir séu nefndir.