Vegfarandi á Sprengisandsleið kom að látnum manni utan vegar rétt fyrir hádegi í gær, skammt norðan við Vatnsfell á Suðurlandi.
Á Facebook síðu lögreglunnar á Suðurlandi kemur fram að líkið sé af erlendum ferðamanni og að ekkert á vettvangi bendi til saknæms athæfis. Af ummerkjum að ráða virðist maðurinn hafa verið einn á ferð.
Lögreglan á Suðurlandi fer með rannsókn málsins og segir að frekari upplýsingar verði ekki gefnar fyrr en staðfest hefur verið að aðstandendur hafi fengið upplýsingar um málið.