Samkvæmt frumvarpi sem dómsmálaráðherra hyggst leggja fyrir Alþingi í mars á næsta ári, verður heimilt að kaupa áfengi í netverslunum hér á landi án aðkomu ÁTVR.
ÁTVR hefur einkaleyfi á smásölu áfengis samkvæmt núgildandi lögum. Þrátt fyrir einkaleyfi á smásölu áfengis er fólki heimilt að kaupa áfengi í gegnum erlendar vefverslanir. Þá fær kaupandinn vöruna senda heim en þarf að greiða bæði áfengisgjald og virðisaukaskatt af sendingunni.
„Netverslun er á fleygiferð, hér og alls staðar annars staðar. Það eru engin haldbær rök fyrir því að netverslun með þessa neysluvöru eigi ekki að fá að þrífast eins og með hverja aðra vöru. Við sannarlega ölum þá von í brjósti að þetta sé fyrsta skrefið sem verður tekið í frekari tilslökun á núverandi fyrirkomulagi á smásölu með áfengi,“
Þetta segir Andrés Magnússon, framkvæmdastjóri Samtaka verslunar og þjónustu. En hann segir frumvarpið rökrétt viðbrögð stjórnvalda til að bregðast við breyttu umhverfi. Greint var frá þessu á vef Mbl.