Ríkissaksóknari hefur fellt ákvörðun héraðssaksóknara í máli Alberts Guðmundssonar, leikmanns Genóa í knattspyrnu, úr gildi og lagt fyrir héraðssaksóknara að höfða sakamál á hendur honum. Hann verður því ákærður fyrir kynferðisbrot.
Vísir greindi fyrstur frá þessu og hefur eftir Evu Bryndísi Helgadóttur, lögmanni konunnar sem kærir Albert, að ríkissaksóknari taki fram í niðurstöðu sinni að líklegt sé talið að gögn málsins leiði til sakfellis.
Héraðssaksóknari hafði í febrúar á þessu ári tekið ákvörðun um að fella málið niður. Sú ákvörðun var kærð til ríkissaksóknara sem hefur nú fellt ákvörðun héraðssaksóknara úr gildi.