Keppnin um sterkasta mann Íslands var haldin um helgina og stóð keppnin yfir í tvo daga en fyrri umferðin fór fram við Thor Power Gym í Kópavogi en sú seinni í Tryggvagarði á Selfossi.
Keppnin fór fram í frábæru veðri og gaf Hafþór hvergi eftir í baráttunni um efsta sætið sem hann hélt allan tímann og endaði með 45 stig í fyrsta sæti.
Í öðru sæti endaði Pálmi Guðfinnsson með 34.5 stig og í því þriðja var svo Hilmar Örn Skagfield Jónsson með 31.5 stig.
Hafþór vann allar sex greinarnar á mótinu en í seinni umferðinni var keppt í kasti yfir slá, göngu með Húsafellshelluna frægu og Atlas-steinunum.
Aðrir sem kepptu á mótinu sýndu þó fantagóð tilþrif á köflum og það er alveg ljóst miðað við formið sem Hafþór er í að það þarf enginn að skammast sín fyrir að bíða lægri hlut gegn honum í aflraunum.
Fyrir áhugasama er hægt að horfa á keppnina í heild sinni í spilaranum hér fyrir neðan.