Kris Kobach saksóknari Kansas ríkis höfðaði á mánudag dómsmál gegn lyfjafyrirtækinu Pfizer þar sem hann segir að „Pfizer hafi villt um fyrir almenningi“ um að lyfjarisinn væri með „öruggt og skilvirkt COVID-19 bóluefni,“ fullyrðingar sem hann segir brjóta gegn neytendaverndarlögum ríkisins. Ríkið fer fram á skaðabætur auk þess að dómstóllinn geri Pfizer að hætta markaðssetningu og sölu bóluefnisins.
Í stefnunni er því haldið fram að Pfizer hafi af ásettu ráði leynt og sleppt úr efnislegum staðreyndum varðandi COVID-19 bóluefnið, meðal annars þær „hræðilegustu“ varðandi öryggi bóluefnisins fyrir barnshafandi konur, með tilliti til hjartasjúkdóma, virkni gegn veiruafbrigðum og eiginleika bóluefnisins til að varna gegn smiti og stöðva útbreiðslu.
10% þungaðra kvenna misstu fóstur
„Pfizer markaðssetti bóluefni sitt sem öruggt fyrir barnshafandi konur,“ sagði Kobach. „Aftur á móti, í febrúar 2021 var fyrirtækið með undir höndum 458 tilkynningar varðandi þungaðar konur sem fengu Pfizer COVID-19 bóluefni á meðgöngu. Meira en helmingur þeirra tilkynnti um alvarlega aukaverkun og rúmlega 10% tilkynntu um fósturlát.
Hlutfall aukaverkana sem eru hvers kyns neikvæð áhrif lyfs var hærra hjá þunguðum konum en almenningi, sem nemur um 17 prósentum, samkvæmt rannsókn sem birt var í tímaritinu Medicine í febrúar 2022.
Fyrri rannsókn sem birt var í læknatímaritinu New England Journal of Medicine í apríl 2021 með bráðabirgðaniðurstöðum sýndi ekki nein marktæk atriði varðandi öryggi meðal barnshafandi kvenna sem fengu bóluefnið. Þar kom fram að ekkert óvenjulegt væri við umrædd fósturlát, og þar með gefið til kynna að fósturlátin væru líklega ekki bein afleiðing af bóluefninu.
Engin hætta á hjartasjúkdómum?
Kobach segir að Pfizer hafi markaðssett bóluefnið sem öruggt í tengslum við hjartasjúkdóma, svo sem hjartavöðva-og gollurshússbólgu. Hann vísaði til spurningar Albert Bourla, forstjóra Pfizer, sem var spurður í janúar 2023 hvort bóluefnið ylli ekki alvarlegri hjartavöðvabólgu. Bourla svaraði: „við höfum ekki séð eitt einasta merki um það, þrátt fyrir að hafa dreift milljörðum skammta.“
„Aftur á móti, eins og Pfizer vissi, hafa bandarísk stjórnvöld, og fleiri komist að því að COVID-19 bóluefnið hafi leitt til hjartavöðva- og gollurshússbólgu,“ sagði Kobach.
Samkvæmt sóttvarnarstofnun Bandaríkjanna (CDC) eru tilfelli af hjartavöðvabólgu og gollurshússbólgu af völdum COVID-19 bóluefnisins sjaldgæf og flestir sjúklingar hafi fengið bata við útskrift frá sjúkrahúsi.
Kobach segir að Pfizer hafi markaðssett bóluefni sitt sem áhrifaríkt gegn COVID-19 veiruafbrigðum, „jafnvel þó að gögn sem voru tiltæk á þeim tíma sýndu að bóluefnið hafi aðeins sýnt virkni í minna en helmingi tilfella.
Ekki vörn gegn smiti
Því er einnig haldið fram í stefnunni að lyfjafyrirtækið hafi ranglega markaðssett bóluefnið sem smitvörn.
„Pfizer hvatti Bandaríkjamenn til að láta bólusetja sig til að vernda ástvini, sem gefur greinilega til kynna fullyrðingu þess efnis að COVID-19 bóluefni frá Pfizer myndi stöðva útbreiðslu smita,“ sagði Kobach. „Pfizer viðurkenndi síðar að þeir hefðu aldrei einu sinni rannsakað smit manna á milli eftir að fólkið fékk bóluefnið.
Kansas er fyrsta ríkið til að höfða mál sem þetta, en Kobach upplýsti að fimm önnur ríki muni ganga til liðs við Kansas.
„Fleiri mál gætu fylgt eftir, allt fer það eftir viðbrögðum Pfizer,“ sagði Kobach.