Kristjana Henný Axelsdóttir deildi nýverið reynslu sinni af Carnivore mataræðinu í Facebook hópnum Iceland Carnivore Tribe – Kjötætur.
Í færslunni segir hún frá mikilli umbreytingu á bæði andlegri og líkamlegri heilsu eftir að hafa tileinkað sér mataræðið, sem felst í því að neyta einungis dýraafurða.
Áralöng vanlíðan – án lausna
Kristjana, sem er 49 ára þriggja barna móðir, lýsir því hvernig hún hafi í meira en áratug glímt við stöðuga þreytu, liðverki og ýmis einkenni breytingaskeiðsins.
Hún hafði prófað fjölmargar lausnir, þar á meðal hormónalyf, verkjalyf, náttúruleg bætiefni og jafnvel lyfið Ozempic/Wegovy til að reyna að léttast.
Ekkert virtist virka til lengri tíma litið.
„Ég var alltaf á bilinu 92-99 kg, sama hvað ég reyndi,“ skrifar hún og lýsir því hvernig einkenni eins og hitakóf, eyrnasuð, kláði í húð, hármissir og svefntruflanir höfðu mikil áhrif á líf hennar.
Í apríl 2024, eftir enn eitt samtalið við sérfræðing sem vildi að hún prófaði sterkari hormónaplástra í þrjá mánuði, fann hún að hún var komin í þrot.
„Ég bara brotnaði niður og sagði að þetta væri nú bara komið gott, ég gæti þetta ekki lengur.“
Fylgdi eiginmanni sínum í mataræðisbreytingu – og upplifði gjörbreytt líf
Eiginmaður Kristjönu hafði stuttu áður hafið Carnivore mataræði sem hún taldi fyrst óspennandi og einhæft.
Eftir að hafa fylgst með honum í þrjár vikur og séð jákvæð áhrif á hann ákvað hún að prófa sjálf um Hvítasunnuhelgina 2024.
Breytingarnar komu strax í ljós.
„Strax fyrstu vikuna fann ég að bólgurnar í líkamanum voru að minnka og meira að segja vigtin fór að breytast mér í hag,“ segir hún.
Eftir þrjá mánuði: „Einkenni breytingaskeiðsins eru horfin“
Eftir þrjá mánuði á Carnivore mataræðinu var staðan þessi:
• Hún hafði ekki tekið nein hormónalyf eða verkjalyf síðan í maí.
• Liðverkir voru horfnir.
• Hitakóf, kláði og eyrnasuð hurfu með öllu.
• Svefninn stórbatnaði.
• Hármissirinn hætti.
• Húðvandamál, þar á meðal fæðingarblettir sem læknir hafði sagt eðlilega vegna aldrurs, voru nánast horfnir.
• Hún léttist um 25 kg.
• Andleg líðan batnaði til muna.
Að auki segir Kristjana að kynorkan, sem hafi legið í dvala, hafi vaknað aftur – bæði henni og eiginmanni hennar til mikillar ánægju.
„Ég get því sagt að einkenni breytingarskeiðsins eru horfin! Far vel!“ skrifar hún og vonar að saga hennar geti hjálpað öðrum sem eru í svipuðum sporum.
Fyrir neðan er hægt að sjá færslu Kristjönu í heild sinni.
