Íbúi í Facebook hópnum Grafarvogsbúar birti óhugnanlega mynd úr eftirlitsmyndavél nágranna síns en myndin sýnir mann læðupokast fyrir utan dyr og glugga hjá honum.
Sýndi myndavélin að maðurinn var að laumast þarna fyrir utan frá 02:23 til 03:00 um nóttina og rýndi inn um glugga og tók myndir.
Maðurinn sem setur færsluna inn segir svo að tekið hafi verið í hurðarhúninn hjá honum sama kvöld en slíkt er algengt til að athuga hvort dyr séu læstar ef þjófar eru á ferð.
Hann segir allt vaðandi í þjófum á svæðinu og í athugasemdakerfinu taka margir íbúar undir það og segja annan slíkan hóp hafa verið á ferðinni nýlega en aðferð þeirra hafi verið svipuð, en það var að mynda bakgarða og hús.
Annar meðlimur hópsins hvetur svo fólk til að fá sér öryggiskerfi.
Ef fólk verður vart við grunsamlegar mannaferðir er það hvatt til að hringja á lögreglu.