Ný rannsókn frá Yale háskóla hefur vakið mikla athygli eftir að vísindamenn þar segjast hafa fundið skýr líffræðileg merki hjá einstaklingum sem hafa glímt við alvarleg einkenni eftir að hafa fengið Covid-bóluefni.
Yale-rannsóknin
Vísindamennirnir greindu sjúklinga með áður óþekkt heilkenni sem þeir kölluðu post-vaccination syndrome eða „eftir-bólusetningareinkenni“.
Þeir segjast hafa uppgötvað að þessir einstaklingar sýndu ákveðnar líffræðilegar breytingar sem gætu útskýrt langvarandi veikindi þeirra.
Helstu niðurstöður rannsóknarinnar sýndu:
• Breytt ónæmissvörun: Ónæmiskerfi sjúklinganna virtist virkja ákveðna bólguferla sem leiddu til stöðugs bólguástands í líkamanum.
• Endurvakning Epstein-Barr veiru: Epstein-Barr, sem veldur einkirningasótt og getur verið í dvala í líkamanum í mörg ár, virtist „vakna“ hjá sumum einstaklingum eftir bólusetningu. Þetta getur valdið langvarandi þreytu og taugakerfisvandamálum.
• Viðvarandi Covid-prótín í blóði: Sjúklingar í rannsókninni höfðu óeðlilega mikið af gaddapróteinum (spike proteins) í blóðinu, jafnvel mörgum mánuðum eða árum eftir bólusetningu. Þetta getur viðhaldið bólgum og stuðlað að langvarandi einkennum.
Algengustu einkennin hjá einstaklingum með eftir-bólusetningareinkenni voru:
• Heilaþoka og skert einbeitingarhæfni
• Þreyta og orkuleysi
• Svimi og jafnvægistruflanir
• Eyrnasuð (tinnitus)
• Skert þol fyrir líkamlegri áreynslu
Vísindamenn Yale lögðu þó áherslu á að rannsóknin væri enn í þróun og að ekki væri enn ljóst hversu algengt heilkennið væri eða hverjir væru í mestri hættu.
Þeir undirstrikuðu nauðsyn frekari rannsókna til að kanna umfang og orsakir þessara breytinga.
Læknar og stjórnvöld treg til að viðurkenna tengslin
Þrátt fyrir vaxandi fjölda frásagna hafa þær verið teknar misalvarlega.
Margir sjúklingar segja að læknar þeirra hafi afskrifað veikindi þeirra sem „tilviljanakennd“ eða „andlega kvilla“.
Yale rannsóknin, sem er enn á frumstigi, mun fara dýpra í rannsóknir á langtímaáhrifum mRNA bóluefnanna.