Maðurinn sem handtekinn var fyrir að myrða þrjá og særa átta alvarlega hefur játað sekt sína og er lögregla tók hann höndum var hann íklæddur blóðugum fötum.
BBC hefur eftir þýskum sjónvarpsstöðvum að maðurinn sé Sýrlendingur sem kom til landsins sem flóttamaður í desember árið 2022.
Sérsveit lögreglunnar réðist inn í flóttamannabúðir og handtók manninn og annan mann sem grunaður er um aðild að morðunum.
Húsnæðið var einungis um 300 metra frá markaðnum þar sem árásin fólskulega átti sér stað.
Hátíðahöldin áttu að standa yfir í þrjá daga en þeim hefur verið aflýst vegna voðaverkanna en straumur fólks hefur lagt leið sína að svæðinu og sett blóm og kransa til að minnast þeirra sem myrtir voru.