Diljá Mist Einarsdóttir, þingmaður Sjálfstæðisflokksins, á börn sem æfa íþróttir af krafti og í nýju aðsendu bréfi á Vísi lýsir hún mikilli ánægju með frábært íþróttastarf sem þau taka þátt í.
Hún bendir hins vegar á að tímasetningar íþróttamóta dragi úr ánægju þeirra sem eiga börn í íþróttum.
Í greininni Diljá þreytu á samfélagslegri kröfu um að fjölskyldur, ættingjar og systkini mæti í stórum hópum til að hvetja börn áfram, „jafnvel á ósanngjörnum tíma eins og klukkan 8 á laugardagsmorgnum.“
„Tímasetningar ættu að vera kosningamál“
Diljá leggur til á gamansaman hátt að tímasetning íþróttamóta verði rædd sem kosningamál.
„Ég er handviss um mikinn þverpólitískan stuðning við slíkt mál,“ segir Diljá og nefnir að umræður af þessu tagi gætu orðið hluti af kosningabaráttu í sveitarstjórnarkosningum.
Þrátt fyrir að Diljá missi helst ekki af íþróttaviðburðum barna sinna lýsir hún óánægju með hvernig þessar samkomur þróast oft í óskipulagða óreiðu þar sem fjölskyldur hvetja börn sín á háværan hátt og neyta óhollra veitinga í leiðinni.
„Það tók Ingu Sæland og fylgisveina hennar einungis nokkra daga að svíkja þessi loforð kinnroðalaust“
Diljá segir að loforð hennar um bann við þessum tímasetningum yrði erfitt að setja í lög þó það myndi eflaust vekja mikla lukku hjá þreyttum foreldrum.
Hún gefur sterklega í skyn að þetta loforð yrði svikið strax eftir kosningar og segir að ef Flokki Fólksins hefði dottið þetta í hug hefðu þau fengið annað kosningaloforð til að svíkja.
Fast skotið á Flokk Fólksins
Diljá fer yfir svikin loforð í kosningabaráttu Flokks fólksins en flokkurinn hafði lofað að hækka skattleysismörk í 450.000 kr. á mánuði og tryggja sömu fjárhæð til öryrkja og eldri borgara, skatta- og skerðingarlaust.
Greinarhöfundur bendir á að þessi loforð hafi verið svikin skömmu eftir kosningar.
„Það tók Ingu Sæland og fylgisveina hennar einungis nokkra daga að svíkja þessi loforð kinnroðalaust,“ segir Diljá og bætir við að kjósendur muni líklega ekki gleyma þessum svikum í næstu sveitarstjórnarkosningum.
Flokkur Fólksins strax í miklum vandræðum
Svo virðist sem stóra loforð Ingu um 450 þúsund á mánuði hafi týnst í stjórnarsáttmálanum þrátt fyrir að hún hafi sagt að hún ætti ekkert erindi í ráðherrastól nema standa við það.
Þá hefur flokkurinn einnig fengið á sig föst skot fyrir að styðja Bókun 35 sem Eyjólfur Ármannsson sagði vera brot á stjórnarskrá fyrir kosningar en tilkynnti eftir á að hann myndi styðja tillöguna.
Þá hafði Inga Sæland, formaður flokksins, einnig sagt bókunina vera brot á stjórnarskrá.
Inga tilkynnti einnig að hún myndi treysta fjármálaráðherra fyrir sölu Íslandsbanka þrátt fyrir að gagnrýna fyrri stjórn harðlega fyrir söluna.
Þá lýsti flokkurinn yfir vilja til að slíta aðildarviðræðum að Evrópusambandinu en eins og frægt er, flaug Þorgerður Katrín til Brussel nýlega til að funda með ráðamönnum þar um stöðuna.
Flokkurinn var svo í erfiðu viðtali við MBL.is, þar sem blaðamaður pressaði á Ingu vegna um 250 milljóna sem flokkurinn hefur fengið í styrki þrátt fyrir að eiga ekki lagalegan rétt á honum.
Inga sagði að slíkt væri bara smávægilegur formgalli og tilkynnti, aðspurð, að flokkurinn myndi ekki skila peningnum.
Í aðsendri grein til Morgunblaðsins sagði svo Inga að kosningaloforð væru einungis viljayfirlýsingar.