Hinn umdeildi og óútreiknanlegi fjölmiðlamaður Alex Jones heldur því fram að varaforseti Bandaríkjanna og forsetaefni Demókrataflokksins muni taka inn e-töflu áður en hún stígur á svið annað kvöld og tekur þátt í kappræðum gegn Donald Trump.
„Hún var með stór sjáöldur, greinilega í góðu skapi. Já, þau ætla að gefa henni e-töflu. Mér er fullkomnlega alvara“
Kappræðurnar verða sýndar úti um allan heim en það er sjónvarpsstöðin ABC sem sér um upptökur og stjórn á viðburðinum. Þær hefjast á slaginu 01:00 aðfaranótt miðvikudags.
Alex Jones, hefur lengi stutt Trump, hélt því fram í þættinum sínum á „sjónvarpsstöðinni“ Infowars að Kamala Harris „ætli að vera undir áhrifum eiturlyfja“ og að hún verði „gjörsamlega út úr kortinu.“ Þá hélt hann því líka fram að þetta væri ekki í fyrsta skiptið sem varaforseti Bandaríkjanna tæki eiturlyf og vísaði til landsfundar Demókrataflokksins sem fór fram í lok ágúst. Þar segir Jones að Harris hafi „litið út fyrir að vera á lyfjum.“
Á áfengi og Xanax
„Hún var með stór sjáöldur, greinilega í góðu skapi. Já, þau ætla að gefa henni e-töflu. Mér er fullkomnlega alvara,“ sagði Jones á rás sinni.
En Jones hætti ekki þar. Hann fullyrti einnig að Kamala Harris hafi verið undir áhrifum áfengis og að hún hefði fengið sér róandi lyfið Xanax fyrir viðtalið sem hún fór í ásamt varaforsetaefni sínu Tim Walz á CNN. Um var að ræða fyrsta viðtalið sem hún fór í eftir að hún tilkynnti um framboð sitt til forseta Bandaríkjanna.
En hvers vegna ætti Kamala Harris að taka inn fíkniefni fyrir kappræðurnar? Jones var með svör á reiðum höndum við þeirri spurningu en hann sagði varaforsetann þurfa að taka inn fíkniefni til þess að glíma við „mikinn kvíða vegna frammistöðu sinnar.“
Fjölmiðlaveldið að hruni komið
Jones, sem er þekktur fyrir súrrealískt ýktar fullyrðingar sínar, stendur frammi fyrir því að „fjölmiðlaveldi“ hans verði brátt lagt niður til að greiða 1,5 milljarða dala í skaðabætur til fjölskyldna þeirra sem létust í Sandy Hook morðunum, eftir að hann kallaði fjöldamorðin „svindl“. Dómari sem úrskurðar um gjaldþrot í Bandaríkjunum hefur tilkynnt áform sín um að loka Infowars og selja eignir þess til að greiða út bætur í málunum sem Jones hefur verið dæmdur fyrir.
Jones hefur sjálfur sagst búast við því að Infowars starfi aðeins í nokkra mánuði í viðbót áður en rásinni verði lokað vegna gjaldþrotsins. Hann hefur þó heitið því að halda áfram með „sprengjuþætti“ sína í annarri mynd, líklega í gegnum samfélagsmiðla. Hann hefur einnig rætt möguleikann á því að einhver annar kaupi fyrirtækið og láti hann halda áfram sem launaðan starfsmann.
Samkvæmt nýjustu gögnum er snerta fjármál Infowars og Alex Jones, sem birt hafa verið af dómstól í Bandaríkjunum, á fjölmiðlamaðurinn umdeildi um 9 milljónir dala í persónulegar eignir. Móðurfélag Infowars, Free Speech Systems, hefur um 6 milljónir dala í handbært fé og um 1,2 milljónir dala í eignum.
Mjótt á munum
Hvað kappræðurnar varðar, sem stefna í að verða þær sögulegustu í manna minnum, þá hefur Kamala Harris verið í einangrun á hóteli í Pittsburgh þar sem hún undirbýr sig ásamt fjölda aðstoðarmanna. Heimildarmenn sögðu New York Times að hún hefði fengið aðstoð frá leikara sem er klæddur eins og Trump, í jakkafötunum með rauða bindið. Allt gert til að æfa ræðutækni sína enda mikið undir í þessum kappræðum sem fara fram í Philadelphiu.
Á sama tíma er sagt að Trump haldi óformlega „stefnufundi“ til að rifja upp hverju hann hafi komið í verk í forsetatíð sinni. Ef litið er til þess að aðeins tveir mánuðir eru til kosningadagsins þá er lítið sem ber á milli Harris og Trump í skoðanakönnunum. Nýjasta könnun New York Times/Siena College sýnir að Trump sé með 1 prósentustigs forskot á Harris – 48 prósent gegn 47 prósentum – sem er innan skekkjumarka könnunarinnar.