Á miðnætti mun rapparinn Aron Can senda frá sér plötuna Trúpíter. Platan er sú þriðja í röðinni hjá þessum vinsæla tónlistarmanni en fyrir hefur hann gefið út mixteipið Þekkir stráginn og Ínótt.
Aron hefur unnið að gerð plötunnar í heilt ár og segir í samtali við Fréttablaðið að nýja platan innihaldi 15 lög sem að hans sögn eru allt „hittarar.“ Platan er unnin í samstarfi við Jón Bjarna og Aron Rafn en umslagið á plötunni er teikning eftir listakonuna Örnu Beth.
Það er mikið um að vera hjá Aroni þessi dagana í byrjun árs gerði hann samning við útgáfurisann Sony. „Sumarið verður rosalegt – það er bara að spila, halda áfram að gera tónlist í stúdíóinu og vonandi bara gefa út plötu strax. Eina vandamálið okkar er að þegar við gefum út plötur erum við bara hálfnaðir með næstu,“ segir Aron í samtali við Fréttablaðið.